AMICIZIA
Seradi entro dó sac a pél
spetón che l vent al passe,
an vent frét che l vien dó da le crode,
par taiarne i dét ormai viola.
ti e mi, dó amizi inamoradi de sól,
de montagna, de silenzio,
de tante scarpinade tra i bósc
ancora insieme par na lontana amicizia,
adés che la bufera fis-cia da far paura
a i còrf e ai falchi
bevón an cuchét de sgnapa
e se parlón, par farse coràio,
de bòn temp, de speranze.
Amicizia, parola vècia come la tèra,
forte, come na man
che se tende sora n strapionbo,
tenera, come na caréza de to mare lontana,
sicura, come la vóze de to pare entro l cór.
Ti amigo scólta, dopo l vent
la còrda sarà ancora pi salda,
i martéi i baterà su i ciòdi come na canzon
par portarne in zima, la su verso l sol.
