AUDIO
Italo Rualta legge:
Gino Tramontin
I POETI E LE MONTAGNE
Le montagne pì bele de ‘l mondo
le avòn qua te ‘l nostro Belun
da la zima fin do fin te ‘l fondo
no sion proprio secondi a nessun.
La matina co’ ‘l sol al indòra
o la not co’ ‘l slusar de stéle
an sussùro,pianin al gnén fora
e le canta ancora pì bèle.
Canta i bosch co’ i sospiri de ‘l vent,
canta l’aqua ridendo tra i sass
e le storie pì bèle te sént
co’ i profumi portàdi do’ in bass.
I profumi de timidi fior,
te le crode tàcadi lassù,
conta storie che parla d’amor
quando al ziél s’inpìza de blu.
Conta storie de tos e tosàte
che sentàdi quassù in mèdo a i fior
co’ le golte de fogo inpizàde
se fa zento promesse d’amor.
E poeti an cin dispetosi
tute quante ‘ste storie à scoltà
e profumi, promesse e sospiri
senza dar su te ‘l ocio à robà.
Conta e canta i poeti curiosi
a la zénte le storie pì bèle
co i so versi che ride festosi
e ghe strùca anca l’ocio le stéle,
te le crode de’l vent i sospiri
trasformàdi te ‘n grande concerto
quele magiche note de zerto
anca noi le ne fa sospirar.
Cussì co lidiér sofia ‘l vent
sora i bosch, su le cròde, tra i fior
quele bèle canzon ti te sént
tute quante che parla d’amor.
