AUDIO
POESIA DE PRIMAVERA
L’aria fresca sia de matina che da sera
finalmente le tornà la primavera
le giornade le è pì longhe scaldade dal sol
chel pasa già alto in mez le neole sora el col
i auziei i scomenza a cinguettà
apena che la luna la và a se pausà
i gai i dà la sveglia de bonora
anca a chi che volaria dormì encora
te sente già el rumor dei pasi dù par i troi
de chi che và a laorà i pì fortunai al dì d’ancoi
e se te ha la finestra verta o en cin in sfesa
i rintoc de le campane de la ciesa
le foie sui alber le scomenza a verdegà
sora le goze de rugiada le le fà sgorlà
co le sbrisa dù encora là par aria
le riflet i raggi del sol en te na cascata immaginaria
i grii scondui en tei ciufet de l’erba encora curta
i canta o i frinis na musicheta tut’altro che burta
le formighe che li sent le se met tute a girà
le se pesta anca le zate chele che no e bone de balà
le af le gira sora che la balera improvisada
le zerca i fiori par ghe dà n’impolinada
co le è strache le se fà na penichella
le se endormeza vizin na vispa cocinella
a na zerta ora però riva quasi sempre el temporal
scominzia a deventà tut negher fora en tel canal
i grii le formighe e anca le af le se met a sosta
parchè chel prà fra poc deventarà na rosta
e difati no và via tant togn e lampi su par le zime
el scomenza a scravazà e straventà su le perline
dopo en cin però i color de l’iride su par i pez
e en bel arcobaleno dal Pelsa a Prademez
primavera la staion che dà la vita
chela che la natura la sielt par rendela fiorita
l’aria fresca e el profumo dei fior en te tuti i cantogn
mareveie che no te cate en te le alt
