AUDIO
TE ‘L CASSÈT DE ‘L COMODIN
De rénto a ‘l cassèt
de ‘n vecio comodin
ò catà desmentegà:
doi nice piturade, an britolin,
na ciave, an ciodo, un boton,
vinti schei, na s’ciona de oton,
na fotografia tuta smarida,
na data e ‘l nome de na tosata.
te ‘l fondo, na vecia fionda ligàda
a coi àsteghi de camaradàrie;
tacà, an vecio pachet de Popolari
co le freègole da tabac de i temp “avari”,
de le prime fumade
scondeste e sofegàde
Ma la roba pi bèla ch ò catà,
l’è stada an fior secà,
senza udor e senza pi color
che ‘l me à ricordà an vecio amor
abù da tosatèl, ancora sbarbatèl,
che ‘l me à fat piander e sognar
E mi sto fior secà, el àse là,
serà co i me ricordi pi bei,
co le frègole de tabac, o i vinti schei
la fionda, la foto, el britolin,
de rènto a ‘l cassèt
d’n vecio comodin.
